عادات قديمة

السلام عليكم ورحمة الله وبركاته


اللهم صلي على محمد آل محمد


حبيت نتعرف على عاداتنا القديمة اللي راحت وأندثرت وأصبحت دقة قديمة ونقارنها بعادات هالأيام

الله على ديك الأيام على قولت صلاح رمضان

ببتدي
بأعراس لول

أعراس لول كلها بساطة وتواضع وتعاون
لول يتجمعو الأهل والجيران في بيت المعرس قبلها بكم أسبوع ينتقو العيش وسوالف وضحك ويغنو أغاني لول مو أغاني هالأيام

وبعدين الريال هم اللي يطبخو ما يودوه المطعم

وليلة العرس ييبو ملا يقرا المالد
الحين لازم فرقة :/:

وبعدين يزفو المعرس مشي يكسرو رجيله مسكين
الحين لازم في افخم سيارة ومزينة بآحلى الزينة

هدا بالنسبة لعرس الريال

أما عرس النسوان

لول يسوو حفلة صغيرة في العصر :×:
وبعدين تروح الكوفيرة
الحين تروح من الصبح ل نص الليل

وفي الليل تقعد ساعة وبعدين يزفوها من الساعة 9 طبعا يكون في بيتهم

ألحين ما تدخل الصالة الا الساعة 11 ولا تقوم الا 2 إذا مو أكثر

ولول ما في لا كوشة ولا طقاقة ولا باقة ولا بطاقات
على طاري البطاقات
الأسبوع اللي فات في جريدة اليوم كاتبين ان في عروس كاتبه على البطاقات يمنع دخول الصالة بدون كمام
مسكينة خيفة من أنفلونزا الخنازير
تخيلو المنظر كمام ومكياج يدحنو

نكمل عاداتنا القديمة


في رمضان

لول رمضان حليووو :<:
ليه طعم خاص نستناه على آحر من الجمر
ألحين كل سنة نقول السنة ابيخ من للعام وهكذا :؛:

وقبل الفطور تلاقيهم يوزعو على بيوت الجيران
لقيمات ~ خبيصة ~ هريسة>>>>>>> الله امبا هريسة

وحتى الحلو عاد غيررر
لول يوزعو بس سبال
ونستانس ازا عطونا فلوس
ألحين لازم مكيس ومغلف وما ادري ويشو بعد :p016:



وفي حاجة مو بس اختفت الا انطمست واندفنت
لول ما نسمع الا الجرس بيت جيرانا يبو طماط لو بصل لو زيت
عادي ما يقولو نستحي
ألحين الله يخلي خدمة توصيل المنازل دقايق وطلبش عندش